MENU
Главная » 2013 » Апрель » 22 » конкурс "сельский директор"
16:22:53
конкурс "сельский директор"
        Муус устар 10 күнүгэр Өлүөхүмэ куорат "Эврика” оскуолатыгар "Тыа оскуолатын директора” диэн күрэх буолан ааспыта. Күрэххэ Өлүөхүмэ улууһун араас нэһилиэктэриттэн, барыта 9 директор кыттыыны ылбыта. Конкурс 4 түһүмэхтээҕэ уонна смс нөҥүө куолас биэрэн элбэх бааллааҕы эмиэ быһаарбыттара. Биһиги директорбыт Михаил Атосович эрдэттэн бэлэмнэнэн олус ситиһиилээхтик кыттан кэлбитэ. Маҥнайгы түһүмэх - оскуола үлэтин – хамнаһын туһунан быыстапка уонна ону көмүскээһин. Төһө даҕаны суол – иис атахтаан хойутаан тиийдэрбит, быыстапкаҕа турбут хаартыскаларбытын, буклеттарбытын дьон – сэргэ олус сэргии көрбүтэ. Иккис түһүмэх үлэни – хамнаһы аныгы олоҕу кытта ситимнээн, үөрэх саҥа тэриллэрин хайдах иитэр – үөрэтэр эйгэҕэ туһанар туһунан сэһэргээһин, билиһиннэрии. Манна биһиги оскуолабытын сөмөлүөт курдук көрдөрөн, киэргэтэн, тыастаан – уустаан, оскуола үлэһиттэриттэн интервью ылан видеоролик оҥорон директорбыт экипаж командирын олруолугар киирэн, кэрэ аҥардар бортпроводница буолан көмүскээбиппитин дьон уратытык, саҥалыы ылынан олус диэн сөхпүттэрэ, дохсун ытыс тыаһын бэлэхтээбиттэрэ. Салгыы үһүс түһүмэххэ үөрэхтээһин сокуоннарыттан боппуруостар, төрдүс түһүмэххэ бэриллибит тиэмэҕэ оруолга (институт ректора, депутат, лектор уод.а) киирэн тыл этиитэ. Бу курдук олус тэрээһиннээх, көхтөөх, көрдөөх конкурс буолан ааспыта. Күрэҕи улуус баһылыга С.М. Федулов, үөрэҕирии салаатын салайааччыта И.К. Торопов тыл этэн түмүктээбиттэрэ. "Бастыҥ тыа оскуолатын директора” үрдүк ааты Дабаан оскуолатын директора В.Г. Чемпосова ылан үөрдэ – көттө. Биһиги оскуолабыт директора Михаил Атосович "Тыа оскуолатыгар инновационнай проектары сайыннарыытын иһин” диэн үрдүк ааты ылан, үөрүүбүт муҥура суох. Эдэр директорбытын бу кыайыытынан эҕэрдэлээн туран, үлэтигэр өссө үрдүк ситиһиилэри, этэҥҥэ буолууну баҕарабыт!
Просмотров: 948 | Добавил: school_tokko | Рейтинг: 0.0/0