MENU
Главная » 2018 » Ноябрь » 19 » Сорсуннаах булчуттар
15:35:35
Сорсуннаах булчуттар

   Токо орто оскуолатын улахан кылаастарын үөрэнээччилэригэр «Сорсуннаах булчут» диэн сылын аайы ыытыллар күрэх буолан ааста. Биирдиилээн хамаанданан бастыыр иһин күрэххэ үс кылаастан  үс хамаанда түөрт көрүҥҥэ күрэх былдьаста.

    Буолар сиригэр тиийбиппит кыыдааннаах кыһын Тымныы оҕуһа сири-дойдуну үрүҥ тыынынан саба үрэн, дойдубут салгына ырааһыран, айылҕабыт хаар маҥан суорҕанынан бүрүнэн иһиллээбиттии иһийэн, чуумпуран көһүннэ. Тулабыт барыта утуйбут курдуга. Саха уол оҕото өбүгэ саҕаттан бултаан-алтаан, айылҕалыын алтыһан кэллэ. Онон биһиги уоланнарбыт кыраҕы харахтаах, сорсуннаах булчут буолан  сүүмэрдэнэн кэлэн, сатабылларын түөрт түһүмэх устата көрдөрдүлэр.

     Күүтүллүбүтүн курдук сүрдээх тыҥааһыннаах киирсии буолла. Булчут кутаатын уматыыттан саҕалаан, араас мэһэйдэри туоруур көрүҥнэргэ тиийэ, хапхаан иитээһиннээх түһүмэхтрдээх ыытылынна. Уопсай түмүккэ Худаев  Алгыс  салайааччылаах  холбоһук  “Уоланнар”  хамаанда  (Тарас Еремеев, Вячаслав Барашков) 1-кы миэстэҕэ тахсан кыайыы өрөгөйдөннүлэр.  2-с миэстэҕэ холбоһуктаах «Сорсуннаах булчут» Габышев Никон салайааччылаах хамаандата буолла. 3-с миэстэ «Хотойдор» Попов Давид  салайааччылаах хамаанда (Яковлев Максим, Нарахаев Юра) буолла.  

     Төһө да тымныы, тыйыс  күн турдар, күрэх бэркэ ааста – кутаа уот,  отуу чэйэ. Ити курдук сылаас киллэринэн, мустубут дьон халлаан кубулҕаттарын аахсыбакка, тэрээһинтэн астынна, сибиэһэй салгыҥҥа дуоһуйа сынньанна. Оттон тэрийээччилэр булчут күрэҕин сыллата  ыыта турар буоланнар эһиил чугастааҕы оскуолалары кытта күөн көрсүһэргэ  балааннаатылар.

    Маннык күрэхтэһиилэр араас сиргэ ыытыллаллар да, маннык таһымнаах күрэхтэһии буолбутун өйдөөбөппүн. Кэлбит ыалдьыттар, көрөөччүлэр бары хайҕаатылар.

 

                                                                                Тэрийээччилэр -  Чердонов К.Г. Яковлев Ю.С.

Просмотров: 14 | Добавил: school_tokko | Рейтинг: 0.0/0